2017年9月17日 星期日

Garden Cafe - 餐桌上的馬拉松


食物:$$$$
環境:$$$$
服務:$$$$

有些酒店的晚市自助餐會分時段,對於奉行慢活慢吃的筆者而言,No Good

Conrad Hotel既自助餐就厲害,由六點鐘開始,食到十點半,足足四粒半鐘任食,直頭係餐桌上的馬拉松。

巡一個圈,食物唔算超級多,不過質素很高,當中更有師傅宰魚環節,確保飽足而歸外,視覺亦得到享受。
    


凍海鮮一項從來受歡迎,雖沒有生蠔,但龍蝦肉嫩味鮮,麵包蟹多羔軟滑,青口飽滿,仲有罕見的琵琶蝦,絕不失禮。而且Refill得好快,不會像某些酒店般遲一步來就無得食,手快有手慢無不適用於這裡。



個人總喜歡吃Cold Cut,所以第二輪就去獵取各式Cold Cut,喜見有咸香的火腿,多拿幾片也無妨同時亦試了點煙三文魚俱不俗。



熱葷的水準比許多地方要高,咕嚕肉唔會留下杰撻撻的汁醬,蝦丸炸至香脆,最要讚的是帶子與避風塘龍蝦仔,前者鮮嫩,龍蝦仔火便控制好,又夠惹味,豉汁炒蜆亦然。



呢度都有燒味,但只切雞與燒兩款,叉燒偏瘦了一點,切雞卻是肉嫩可口。



不過講到雞,必要提到佢既海南雞飯,油飯真真正正充滿油香,雞肉滑不溜口,伴上三色醬是一流以自助餐水準去計,首屈一指。



作為食肉獸既我,總唔會放過燒牛肉與燒豬柳,師傅大概見我垂涎的樣子,給了我一塊勁大的燒牛肉,粉紅色水合晒心,肉質嫩口有肉香,幾款醬汁之中,我選配了蒜茸燒汁,來得更惹味。豬柳其實絕不輸蝕。



吃至此時,聽見噹噹噹噹的聲響,是宰魚時間。酒店會按季節選擇時令的魚類,是晚的就是平政。師傅手起刀落,三兩下手勢已將肥美的平政宰好。壽司刺身檔可以略過,但這條即宰之平政,是排隊也要吃的。每人每次只張拿一碟,喜歡的可以再排,我可以說,安哥是理所當然之事。



甜品之前,先吃少許芝士吧,都係BrieEmmental等的正路貨,仲有重口味的Pepper Boursin



甜品款式唔少,有蛋糕有泡芙有果撻,乜乜乜。當中有兩款我認為是必吃的,分別是黑森林蛋糕,以及雞蛋仔(有原味和朱古力口味),雞蛋仔更以紙袋,甚有街頭風味。



仲有四款Movenpick雪糕,甜魔也夠滿足了罷~


餐廳資料:
Garden Cafe

2 則留言:

  1. 我都鍾意Conrad個buffet,不過剛跑完馬拉松,見到個標題少少驚! ^_^"

    回覆刪除