2017年7月5日 星期三

The 5B Private Corner - 有線旁的樂土


食物:$$$$
環境:$$$$
服務:$$$$

工廈內的特色食肆,近年愈開愈多,愈開愈有個性,食物質素亦愈來愈高,但大部份集中在官塘,以及荔枝角。

我家附近,查實也有水準的工廈食肆,一間咁大把,年多前我曾來過吃All Day Breakfast,今次就來食晚餐。

印象中,以前週六晚及週日不營業,但今天已經由星期一開到星期七,多勞多得。

餐廳氣氛一如以往的輕鬆,有電視,可捉波子棋,仲有不少唔同類型既書籍,可以來Hea足半天,稱得上是個安樂窩。
   


晚餐有四款,價錢由一百中至二百頭,已包餐湯沙律甜品及茶啡,收費算合理。若晚餐唔岩食既話,其實餐牌中的任何主食,另加三十個大洋就可以轉餐,所以款式並不少。



點好了餐,沙律先送上,沙律菜大致新鮮爽脆,以百幾蚊既晚餐而言,收貨有餘。



通常沙律或餐湯是二擇其一,呢度兩樣有齊,而且是晚的南瓜湯十分有水準。瓜味濃郁,還混入了螺肉及蝦等小量海鮮,我難得地喝得一滴不剩。蒜茸包又是香脆,但可有更多蒜茸,我不介意吃後呵氣如蘭,哈哈哈!



主菜大家開心些牙,其中之一款,是煎鱸魚。兩件鱸魚柳煎得皮脆肉嫩,簡單一點點黑椒與鹽作調味,已很棒。以一些火箭菜及橙黃色的蕃茄等作點綴,賣相更美之餘,感覺也健康點。



另外的黑松露什菌意大利麵,一句講晒,香氣四溢,連我這食肉獸也得大讚。



再一款是法式油封鴨腿,這味「西方腊鴨」,皮脆肉不嚡口,還帶有恰到好處的咸香,除沙律菜外,更伴以幾件清甜的橙去中和鴨腿的咸味,是十分有心思的安排,滿意。



甜品,就在出面餅櫃任選蛋糕,點指兵兵,點來焦糖,以及日本芝士蛋糕。前者質感軟熟,帶焦糖的香甜,後者芝味無窮,沒投訴了。



美中不足,是餐後的一杯Latte,水準不似預期,或許是我期望太高。

遇見一些明星也前來用餐,大概是因為近有線了吧!


餐廳資料:
The 5B Private Corner

5 則留言: