2017年7月31日 星期一

紅糖 - 許個願~


食物:$$$1/2
環境:$$$$
服務:$$$$

近期最新最吸引我的酒店,毫無疑問,是位於紅磡,走Urban Resort路線的Kerry Hotel

原來酒店不單止誘惑到我,更打動了我老媽子,佢比我更早已到過Big Bay Café食自助餐,認真巴閉。

聽說自助餐幾好,於是便再下一城,一家人去到紅糖飲茶,試試總廚余師傅的手勢。
   


講起余師傅,早在佢係國金軒既年代,筆者已見識過佢既功架,當年一入主掌舵,旋即為國金軒摘下兩粒星星,實力毋容置疑



走上海黃埔街的懷舊路線,紅磚頭作主調,配合無敵海景,感覺不太似飲茶食點心的地方。



叉燒早已是飲茶必吃的項目之一,除非那裡沒有燒味供應。呢度既出品,梅頭,燶邊,入口也非常腍身,可惜肉香欠奉,須靠蜜汁補拙。收取頂級價錢,我想,要求應該可以更高。



另外的桂花蜜脆鱔就好得多,脆鱔肉厚,口感彈牙,結合甜度恰到好處的桂花蜜,個人十分欣賞。始終,這味也是當年國金軒的招牌菜色,唔會衰得去邊。



再來就是點心,蝦餃燒賣幾乎是必然正選,蝦餃唔夠分,我棄權,據云麻麻地。反而鮑魚燒賣又唔錯,鮑魚軟腍入味,燒賣企身飽滿。



雪山叉燒包包身微脆,餡料豐足,味道可口,一致認同是全場最出色的點心。



以往一般吃山竹牛肉球,這兒就有新意思,上湯浸牛肉球,口感鬆化不死實,又見識多點新嘢。



XO醬炒腸粉,與XO醬炒年糕之間,我們選了後者。這兒的XO醬本身是好嘢,夠香,可惜嫌炒年糕未夠鑊氣。



來個上湯浸莧菜來平衡下,很嫩口的莧菜,帶點清甜,還好。



龍門炒米粉也有水準,米粉是混入了粉絲,口感更佳。配以蝦球、叉燒絲及芽菜等材料,吃兩碗不成問題。



甜品正在呼喚著我,香甜軟熟的馬拉糕只是熱身,北海道牛乳布甸才是主角。



震騰騰的牛乳布甸,頂頭放了些芒果粒及一片薄荷葉作點綴,美觀一點,層次也豐富一些。




下次,我想去Lounge,歎個三層架下午茶~

餐廳資料:
紅糖

6 則留言: