2016年11月14日 星期一

盈福28 - 食呢D~



物:$$$$
環境:$$$$
服務:$$$$

銅鑼灣有間盈福小廚,我未曾惠顧過,卻對它有著莫名的好感,很想找天會一會佢。

然而,講就兇狠既我,講左N次,拖了又拖,人家連分店盈福28也開了出來,我仍未到訪過。

既然如此,不如先試新嘢?各位老友記原來都對呢間有興趣,馬上成事。
  




總覺得整個格局,跟中環的唐宮小聚有幾分相似,其中許多菜色,也是配上搞鬼的名字,滲出玩味。

或者新開業不久,尚未有太多人認識,我坐左成晚,員工多過客,可以用慘淡去形容。但公道點說,佢哋既服務,幾好!





係真。民主的教育下長大既我哋,懂得什麼叫民主,不是一方說了算,更不會有所謂權威人士鑒粗來。點菜呢個環節,可充分體現。





三人行,冷盤一份已足夠,就來桂花伴山藥。爽脆的山藥切成薄片,像吃薯片一般,與清香甜蜜的桂花糖,十分匹配,是個甜美的好開始。





熱菜陸續上桌,先講脆皮牛魔點醬,呢款脆片牛腩並不是什麼嶄新製作,但這裡做得好在皮脆而不硬,唔怕甩皮甩骨,牛腩入口鬆化,沾上咖喱汁,惹味,比起很多高級食府,還要出色。但我認為,此品若配以燒汁,會更討我歡喜。




另一款酸味味鳳尾,若沒看英文,還以為會是咕嚕雞球的做法。查實,佢係用上西檸汁的方式,但凡帶酸的菜色,我也會喜歡。




再來的蕃茄湯時蔬,重點在於茄湯,流露出自然的味道,無加過份修飾。





晚上也有部份點心供應,要試試!奶黃蜜語,即是奶黃包,但印上潮語,我們的一籠是「講呢D」,唔知會唔會有「真係架」,或者「點解嘅」?

說回奶黃包的水準,包身鬆軟,味道香甜,不俗的。





將台灣的刈包,稍作微調,取個得意名字,叫猛虎咬豬,有趣。包身印上老虎腳印,內裡的腩肉肥瘦有致,又不韌,連同酸菜,乃驚喜之作。





猛虎咬魚是同樣道理,只是內餡換成魚柳,配上的唔是沙律醬或者wasabi,而是日式芝麻醬,想不到又幾襯,別有一番風味。

以往,我會覺得呢類好食抵食既餐廳一定會做得住,但現今香港,已將我從小學習的道理都顛倒了,正常思維已經唔Work… 好似係。

餐廳資料:
盈福28
銅鑼灣駱克道463-483號銅鑼灣廣場二期5樓
23195800

6 則留言: