2015年12月15日 星期二

新店速遞:安南 (又一城店) - 似乎,無得輸~




食物:$$$$
環境:$$$$
服務:$$$1/2

安南,我去過啦,大概兩年前左右,仲記得有人請我食甜品添!當時,只有銅鑼灣一間店。

轉眼間,已開到第三間分店。最新的一家,就落戶於筆者認為從來冇得輸的地方,又一城。

曾經有很多行家問,在香港哪個商場插旗最好呀? 筆者都會回答,又一城啦,如果你入到去既話。

可想而知,安南在這裡,會是幾咁爆場呢!
 


呢幅畫唔嘢少
職業病又發作,再繼續講的話,我可能會走去計埋佢人均消費、翻檯,甚至毛利
 
開開胃

所以,都係睇番食物,很久沒嚐過如此豐富的午餐。先由沙律打開胃口,扎肉、雞肉、藕藤與紅蘿蔔等切絲組合成的沙律,清爽醒神,好開始。
 
份量好大

炭燒牛肉伴濱海,牛肉份量大得有點誇張,在座有朋友笑說,應是以牛肉包裹生菜來吃。事實上,鬆化又香口的牛肉,沾點魚露,跟又滑又彈牙的濱海,和爽脆的生菜,是最合拍的組合。
 
酸酸甜甜

吃過清爽的東西,再來就是湯,並不是冬蔭公咁簡單,而係大頭蝦酸湯。由於加入了菠蘿,味道是酸中帶甜,同是很開胃的一款。大頭蝦爽彈,似乎已是理所當然的事。
 
好正!

同集團Mango Tree的咖喱蟹一級棒,呢間既椰青蒸肉蟹,也是超級正斗。啖啖肉又鮮美的肉蟹,吃得令人如痴如醉,不能錯過墊底的蛋白,滑不溜口,再加上椰青水的鮮味,與芒果樹的咖喱蟹各有千秋。
 
配法包一流

好吃的,肯定不只是肉蟹,隨次而來的咖喱牛筋腩,也有水準。咖喱汁香氣十足,辣度溫和,牛腩鬆化入味,牛筋膠質豐富,薯仔好粉嫩,以香脆的法包來伴之,再飽也吃了幾件。
 
惹味

炒芥蘭苗太清淡,加入咸魚去炒又唔同,香口惹味得多。
 
脆卜卜

還未完,仲有軟熟的蕉葉糯米飯、濃香的牛肉河,以及脆卜卜的春卷撈檬,好在是大家分享,我只作淺嚐。
 
濃郁

甜品就梗係唔怕多,咖啡奶凍實在幼滑又滿是咖啡香,仲有三款口味的雪糕,自家制的,椰子、香芋和熱情果,我統統唔會放過。

食勻佢
 
睇嚟,呢度有排旺。


餐廳資料:
安南
九龍塘達之路80號又一城L1層20號舖
2866 2803

6 則留言: