Opera House Italian Restaurant & Bistrot - 龍蝦先生，您大鑊了！

食物：$$$1/2

環境：$$$$

服務：$$$$

星期六不用再返工，睡到自然醒，之後出去食Brunch，已是我的首選節目。

說起來，現在愈來愈多餐廳推出Brunch，單是灣仔/銅鑼灣，隨口數數，最近便試過了萬麗海景酒店、Mango Tree，以及Hooray Bar & Restaurant…

現今，位處合和附近的Opera House也加入戰團，推出以龍蝦為主題的全新早午自助餐。龍蝦先生，今次您大鑊了！

龍蝦主題

雖然不是首次前來，但也早一點到埗，先周圍影下相，了解下自助餐的食物款式。原來，真係好豐富，好豐富！

 

清新開端

率先進攻幾款冷盤，龍蝦他他、龍蝦Carpaccio，同埋牛油果龍蝦沙律，全是清新的龍蝦系列，仲要係任攞任食，實在太令人滿足。

 

任食唔嬲

另外，每人還會奉上一客 (半邊)凍波士頓龍蝦。青色的蝦羔多而香，龍蝦肉爽口，自行灑上一點檸檬汁，唔錯。不夠喉的話，可以再柯打，任食唔嬲。不過我還是要保留食力，往後仲有大把美食呀喂。

 

正!

龍蝦菜色太多，要暫停一會，以軟熟的風乾火腿間一間場。各式的火腿、莎樂美腸等，包裹著清甜的哈密瓜吃，從來是我的心水。再呷幾口prosecco，係假日的至高享受。

 

柔軟可口

龍蝦以外，仲有一樣很吸引的東西，就是柔軟有奶香的Burrata Cheese。單是我以上吃的幾款，已經夠殺。

 

濃郁

甜魔媽媽還拿來了大碟的龍蝦湯，大家分享。龍蝦湯的味道濃郁，是輕輕的咸了一丁點，卻都不是大問題。

 

萬人迷

假日早午餐的Egg Benedict，已令很多朋友嚮往，這裡的出品，更會加入了龍蝦肉，使唔使咁誇張呀? 如果蛋的火侯可以控制得好些，就好了。再者，迷你龍蝦漢堡，除了龍蝦肉外，更塗上了黑松露醬，倍添矜貴。

 

還好

以焗芝士肉醬釀螺絲粉，賣相不俗，吃起來很香，外皮煙煙韌韌的，蠻有趣。

 

芝士焗

主角，仲有四味焗龍蝦，分別是芝士、南瓜、香草和蕃茄口味，我沒有本事清掉四款，只選了最穩陣的芝士焗龍蝦，又香又多肉，讚！

 

好多龍蝦

唔好俾佢停，即叫即製的龍蝦意大利飯，以及龍蝦意粉亦隨之送上。Pasta果真做出彈牙的口感，而意大利飯，味道亦毫不失禮。除混入龍蝦肉外，每碟更附上一隻龍蝦鉗，好浮誇。

 

甜魔主菜

飽得九九十十，係時候要醫甜胃。蘋果撻和朱古力撻，兩者之中我較喜歡後者，貪佢夠濃郁。仲有小杯的芝士蛋糕、燉蛋、木糠布甸等。不過，最矚目的，必要說到龍蝦奶凍。

 

好吃

事實上，我最喜歡的甜品，皆不是以上的東東。這裡的開心果雪糕，才是一絕。我平時不愛這口味的雪糕的，但這兒的出品，味道不會假，真係超好食囉！是我的心水推介，必試！

 

好好享受假日

雖然不用上班，但也來杯Latte，作為美好假日的享受。

餐廳資料:

Opera House Italian Restaurant & Bistrot

灣仔皇后大道東109-111號地下及1樓

2520 6677