食物：$$$$
環境：$$$$
服務：$$$$
早前跟識飲識食的朋友午餐，談起位於南華會的甘棠燒鵝，原來大家都好有興趣，於是食家朋友主動提出話安排一局，我當然以行動表示支持。
定好日子，帖子發出去，一呼百應，我都好耐無參加過類似的飯局了。
食家朋友好有效率，很快便與店方商議好菜單，內容已顧及了首次到訪及已吃過甘棠的出席者的口味，十分細心。
甘棠與鏞記的關係，相信大家都略知一二，所以鏞記的名物之一，子薑皮蛋，也就成為了我哋飯局既頭盤。另一款鏞記既招牌菜式，松子雲霧肉，同樣在菜單之內。肥肉的比例夠多，自然來得甘香，坦白說比起我對上一次在鏞記吃到的，有過之而無不及。席上大半的朋友都是為甘一刀叉燒而來，包括我。厚切、大燶邊又肥美的叉燒，吸引到不得了，肉質鬆化，蜜味充足，呢件叉燒實在無得輸。一件甘一刀叉燒，一件雲霧肉，細食既我，已飽了一截。扎蹄是我向食家朋友表明想吃的一道，佢就更加細心地點來了鴛鴦扎蹄，花功夫又帶肉香的，陳意齋有名的蝦子扎蹄，一次過滿足兩個願望。店員將原隻大燒鵝端上來俾大家影相後，便拿回去做佢既片皮鵝二食。用鵝來取代鴨，唔使問都知有更豐盈的油香，用麼麼皮包裹著，夾埋青瓜條等，好吃。第二食係炒鵝鬆，都係生菜包既做法，鵝肉當然更香，店方還配上脆米給大家加進去，絕對是神來之筆，層次更為豐富。接著來又是鵝，係一品鵝。除了鵝肉，一系列的鵝內臟如鵝腸、鵝紅及鵝肝等，吃得大家津津有味，大呼膽固醇萬歲。由於鵝肝精彩，大家即時追加了十件，好瘋狂。慢煮的方式，鹵水烹調，質感絲滑，入口溶化，天堂級既美食。呷幾口家常味道的番茄薯仔梳囉魚湯，感覺舒服，湯料恭整地砌好，也是甘棠的一田貫做法，如果魚既鮮甜味可以再強烈啲仲好。上湯蒜子浸莧菜，勝在莧菜細嫩。單尾的炒河粉，簡單到連牛肉都不用放，鑊氣足，就咁陳皮炒，已經好出色。每次都係喇，以敬送的陳皮紅豆沙作結，畢竟這類地方總不會有太多的甜品供應。超滿足的一夜，感謝搞手既細心安排，畢竟組織一個飯局其實真心煩。
絕大部分菜式都好想試呀，不過呢邊食慣咗鴨，少有得食鵝，的確覺得有啲易覺油脷。
回覆刪除但鵝真係好食好多
刪除