農圃飯店 - 當年的高級食府

食物：$$$1/2
環境：$$$$
服務：$$$$

今年母親節，夾到阿妹一家時間，齊齊去食餐午飯。

揀左去歷史悠久的農圃，屈指一算，又是超過十年沒到訪過的店子。

餐廳門口多年來放了一隻牛，未知是否懷緬/響往著昔日香港股市興旺，人人鮑魚魚翅撈飯既風光日子。

是母親節前一星期的週日到訪，近乎包場狀態，家陣香港既市道真係......

這裡的小食，永遠令人印象深刻，因為並不是給你一碗花生或者合桃，而係手拍青瓜、涼瓜，以及紅炆牛展牛根，其中最後者，夠入味口感又好，可算是農圃的特色。

農圃大概是釀胏翼的始祖，怎可以不點? 漲卜卜，色澤亮麗，賣相甚至比起我十多年前吃時更吸引。新鮮即製，吃時真要小心燙口。當你大啖咬下去，雞皮香脆，糯米飯軟熟不硬，可是就偏淡口。

之後是一大輪的點心，有些我沒試就不多說，要談些我吃過又留下印象的就是。雞蛋煎腸粉是為小朋友而點的，可惜實在太乾了，又唔夠香口，即使沾上芝麻醬及甜醬，大人甚至醮來XO醬，亦無補於事。

潮州粉果個子偏小，澄麵皮還可以，至少不黏牙，但味道普通，比起我上星期在新蒲崗英記吃得，還差了一截。

沙律海鮮卷勝在夠熱夠脆口，這都是兒時飲茶最愛的點心之一，好有回憶。

老媽子嫌金錢肚太韌，但我又覺得無問題，仲幾入味添。

好少飲茶既地方食到魚蛋魚片河，又來一碗大家開心些牙。簡單總結，重點是個湯，其餘的都是不過不失。

甜品環節，脆麻花上桌仍是熱的，口感鬆脆，沾上糖漿，我吃了幾件。

反而奶皇馬拉糕，雖然鬆軟，但層次感一般，或者奶皇那層可以強化一些，會更合心水。

要讚下呢度既服務，不像那些老牌名店咁大鼻，好到位好有溫度的。

餐廳資料:
農圃飯店
銅鑼灣新寧道8號中國太平大廈一期1樓
2881 1331