海外篇：Auntie Gaik Lean's Old School Eatery - 檳城一星

食物：$$$1/2
環境：$$$$
服務：$$$$ 

喜歡四圍飲飲食食，累積下來，港澳日韓星泰，以至於歐洲的車軚人星店都吃過不少，但22年尾才有米芝蓮指南的馬來西亞，仍未見識過。

翻開車軚人的書仔，全個檳城只有兩間星店，都係一星，分別是主打法國菜Au Jardin，與及娘惹菜館Auntie Gaik Lean's Old School Eatery。

雖則筆者喜歡吃法國菜fine dining，不過一場來到檳城，又無理由唔食娘惹菜既，所以我選擇了後者。

預先在網上訂了枱，要落些少Deposit，都無乜所謂，呢個都係好正常既做法。

先來些喝的，薏米水和玫瑰特飲都唔貴，但味道偏淡口。

見餐牌有個娘惹拼盤，一次過可以試到幾款嘢，就要客試試。炸蝦餅有幾分似天婦羅，然而未夠香脆，蝦肉成份亦唔多。野菜及蘿蔔沙律帶點點辣，幾開胃。金杯既脆盞做得幾好，夠鬆脆，沙葛、蝦肉等餡料充足，同樣微辣醒胃。五香腐皮卷既口感和味道都合我心。

原先無打算叫炒飯，但店員大力推薦，都試下啦！爽口，同埋好多香料的感覺，蠻特別，但未至於一試愛上。

再叫份魷魚沙律，質感唔韌，酸酸辣辣，少許像泰式的出品。

點都要吃些甜品才算圓滿，不過呢度選擇只得三款，連娘惹糕點都沒有，結果選來一份傳統的甜湯Pengat，椰漿入面見到還有香蕉、芋頭等滿滿的食材，但味道是很甜的，未必人人可以接受到。但夠地道，我作為過氣甜魔，自然要清晒佢。

總算是個幾特別既星級體驗丫~

餐廳資料:
Auntie Gaik Lean's Old School Eatery
1, Bishop St, Georgetown, Penang