一幻拉麵 - 吹水夜

食物：$$$$
環境：$$$$
服務：$$$$

好友移居英國已一年多，最近終於可以回港渡假，把握機會食番幾餐，聽下佢係當地生活的點點滴滴。

之前大家己同佢食左片皮鴨，今次問主角想食乜，佢竟然話日式拉麵，真係估佢唔到。

好啦... 咁就去一幻啦！純粹因為我覺得蝦湯拉麵在英國比較難搵到。

餐牌中的二人餐有兩碗拉麵，一份小薯茸，一份餃子，與及兩小碟小食和飲品，似乎幾好。

或者主角已適應了英國的飲食習慣，又或者佢準備要大吐苦水，以往在香港甚少飲酒既佢，先來啤一啤。

薯茸沙律加入左魚子豐富口感；木耳切成絲再漬過，入口醒胃；叉燒薄身有肥脂，如果可以火炙一下，定必更理想。

餃子色水比較深，但味道正常，同埋最緊要係底部煎得夠香，作為日式餃子控既筆者表示滿意。

套餐的拉麵可自選款式，麵條，與及軟硬度。我的選擇就是番茄蝦湯拉麵，平生最憎粗麵既筆者，自然是要幼麵，有咁硬得咁硬。

蝦湯依然濃郁，湯底始終是這品牌的強項，麵條亦進步了不少，沒有那股強烈的鹼水味，軟硬程度做到要求，加上軟嫩的叉燒，真正的溏心蛋，粟米粒及麵酥，滿足。

復活節假期有百幾萬人離港，呢度同香港大部份既餐廳一樣，人客不多，可以食到傾到飽都無人會催你還枱。

餐廳資料:
一幻拉麵
銅鑼灣告士打道280號世貿中心3樓L3-07號舖
27893799