2022年8月8日 星期一

獅房菜 - 中式的廚師發辦



食物:$$$$
環境:$$$$
服務:$$$$ 

今時今日,廚師發辦已不再是日本餐的專利。中餐,獅房,一樣可以。是晚我就去左帝京酒店的獅房菜,食左個九道菜既Omakase。

第一道既寒赤,黃色嗰粒波波係胭脂烏賊,紅色的就是茄湯,前者口感有幾分似食朱古力,後者就會爆汁,好清爽,但記緊要一啖過,否則肯定會噴到水花四濺。海茸烏參贏在口感。

第二道既竹青,其實係一個湯。湯頭的胡椒味對我來說是恰到好處,裡頭有花膠、鮮蜆及鴨舌等,足料,合心。

再來的月白,係滑溜既茶碗蒸之上,放左一條栩栩如生的金魚餃。金魚餃塞滿龍躉肉,感覺豐富。

第四道的焰粉,係我喜愛的牛肉菜式。用上的是澳洲M5和牛,以壽喜燒的做法,放在豆腐之上。牛肉軟腍帶微甜,不特止,師傅加左少少花椒粉,帶出幽幽麻香,盡收畫龍點睛之效。

以雪葩清清味蕾,可以繼續下一道菜色。

以黃色為主調的澄黃,主角係爽脆彈牙既大虎蝦,本身已好食。淋上以呂宋芒打造而成既汁醬,配以黑魚子作點綴,食起嚟就更加清新醒胃。

接住嚟既妃玄,實情係個鮑魚酥。南非鮑軟腍入味,酥皮夠酥香,混入少少法國鵝肝醬,成件事更香,味道更豐富。

愛吃上海菜既我,對鬱金好有期待,因為這是迷你版本的紅燒獅子頭。以蟲草花及津白等作配襯,倒是不錯。

甜品之前也有飯,係龍蝦湯泡飯,叫霜嫣。喜歡個湯夠濃郁,結合脆米,其實好難會唔好食。

以雞頭米及蝶豆花製成的『蔚藍』,清新輕怡,最抵死係面頭嗰片仿既三文魚,令賣相更上一層樓。

絕對係令人歎為觀止既中式廚師發辦。


餐廳資料:
獅房菜
旺角太子道西193號帝京酒店3樓
26226088

4 則留言: