2022年6月20日 星期一

書湘門第 - 湖南午餐



食物:$$$ 1/2
環境:$$$$
服務:$$$1/2

今日中午,去左荃灣書湘門第食辣。

好幾年前食過書湘門第西環店,即連續8年獲米芝蓮推介嗰間分店,印象中係OK既,所以就嚟試下荃灣開新店。

幾中意呢度既環境,枱與枱之間好濶落,又有落地玻璃窗,空間感十足。

午餐會跟小食同埋白飯,是日小食係涼拌木耳,辣多於酸,不過係幾開胃的。

要左個湘味梅菜扣肉,估唔到呢類咁中式既地方,會用上LC既碗喎! 看上去好似有啲辣咁,其實係完無唔辣的。扣肉夠肥,夠甘香,近乎入口溶化,瘦肉既部份都唔怕韌,好入味。扣肉連埋墊底既梅菜,勁邪惡,但又勁好味,真係好好送飯。一個蒸既砵仔飯是有啲唔夠喉。

另一份的刴椒魚頭,份量比我想像中要大。呢味經典既湖南菜,賣相會嚇親人,但其實辣勁唔會太強,反而是酸酸辣辣咁,好醒胃既。大頭魚既魚肉很嫩滑,不過有唔少細骨,食既時候要小心。

刴椒魚頭本身都係跟白飯,不過佢配麵先更夾,所以我都加左錢去轉麵。爽身的麵條,伴以酸辣既汁醬,一流。

見兩份午餐既主食都唔錯,心郁郁又想食少少甜。糖油粑粑,很傳統的湖南甜品,煙煙韌韌既糯米浸在糖汁之上,睇見會以為甜到漏,實際甜度偏低,係幾特別的一道甜點。

食辣要有兩手準備,叫定罐可樂,確保唔會辣到噴火嗰時,遠水救唔到近火呀!


餐廳資料:
書湘明第
荃灣德海街18號富利達中心1樓
64688533

4 則留言: