2022年2月16日 星期三

彩虹串燒專門店 - 變陣



食物:$$$$
環境:$$$$
服務:$$$$ 

晚市禁堂食,串燒店很當災。

不過香港人出名轉數快,加上已經唔係第一次,總有方法去應變,掙扎求存。

彩虹小食串燒專門店,原本只開晚市,但家陣都要變陣,中午便打開門口做生意,賣越南河粉,與及碟頭飯。

盲盅盅十二點半走左去,成為第一個客人。

自己手機落單,已經成為大趨勢,可以慳番啲人手,依家做餐飲,尤其是小店,真係要慳盡一分一毫。

午餐幾抵食,就是最貴的招牌厚切牛脷丼飯,跟埋罐汽水,都只係六十二蚊。

四件牛舌係超厚切,睇睇圖中的橫切面就可知道,雖然如此厚身,但質感仍保持軟腍爽口,蠻好吃的,轉瞬間,四隻牛脷已安葬在我的肚子裡。

由於食物令人滿意,過兩日我又再幫襯,今次要碗牛太扎肉越南河粉,連汽水盛惠五十個大洋,仲抵~

份量幾大的,湯色不是深不見底的濃郁版本,不過都算夠味。扎肉有一定厚度,咬落有點口感,牛丸已開邊,吃得更方便。呢個價位,無可能再投訴。

希望店子頂得住,我仲要同朋友夜晚嚟食串燒架!


餐廳資料:
彩虹串燒專門店
荃灣運通街8號運通洋樓地下M號舖
97231611



4 則留言: