2022年1月11日 星期二

大滾友火鍋 - 滾得過



食物:$$$$
環境:$$$$
服務:$$$$ 

荃灣千色店附近的西餐廳Munch,頂左幾年終於捱唔住,新接手的是一家火鍋店,名叫大滾友,於我這邊爐控而言,絕對係喜訊。

又『聖旨』,又龍頭火鍋盆等,全為相機食先的朋友而設,今時今日開店,不論做咩菜種,都要顧及這點。

甫坐低,店員便放下九宮格的調味料,大家又要做打邊爐的指定動作 – 混醬。竟然見到有一小碟辣黃瓜,算是前菜,抑或係調料? 哈哈~ Any肥,我其實好簡單,生蒜加豉油,就是我的選擇。

打開點餐紙,食品名稱/類別都是刻意搞鬼,如飽暖思牛肉、飛機手打丸、今晚餃唔餃等等。

十二款湯底之中,我們揀了椰子雞鍋。店員將鍋底奉上來時,鋒煙四起,是乾冰做出來的效果,把乾冰放入湯底內實在比較罕見。椰子、杞子、粟米、半隻雞,以及六隻蜆,幾豐富的。

配料方面,選上了廣島蠔,個子當然不及桶蠔巨型,不過隻隻飽滿,即使浸久了也不會縮,而且味道鮮美,是好東西。

炸嚮鈴是火鍋的大路之選,這兒更有邪惡版本的黃金嚮鈴。不難猜,這就是外層加入了咸蛋黃的出品。奉來時仍是熱暖的,可以不沾湯吃,咬落酥脆,金沙也肯定夠香,比起一般的嚮鈴好吃九條街。

韭菜豬肉餃包得靚仔,贏了印象分,如果可以再多點韭菜香,自然更吸引。

朋友不吃牛,要我自私食一碟牛頸脊是沒有問題,但分甘同味永遠更開心,所以改要了一份伊比利亞豬。質素唔差的,軟腍亦不失肉香,食肉獸表示滿意。下次約多幾位朋友一齊嚟擦番兩碟牛吧。

白蘿蔔吸成花花形狀,算是有誠意。吃至中後段才放入湯裡浸,淥至軟腍,索晒味,加上蘿蔔本身清甜,肯定美味。

最估唔到,贈送的木瓜雪耳糖水,都咁滋潤。

九點半後入座,仲有75折添~

可惜此文出街之時,已晚市禁堂食了。


餐廳資料:
大滾友火鍋
荃灣青山公路荃灣段125-133號紅棉大廈地下A&B號舖
23832268
65576704 (Whatsapp)

4 則留言: