帝京軒 - 久違了的點心

食物：$$$1/2
環境：$$$$
服務：$$$$

疫情之下，你有無好想出街食飯?

忽然一天 (中午禁堂食仍未生效)，老媽子話要去飲茶，我估佢忍左好耐。

飲茶無問題，不過要搵間乾淨企理既食肆，酒店中菜廳大概吃得更放心，諗諗下，不如去帝京?　

店家當然做足安全措施，一進酒店即有紅外線體溫檢測，餐廳枱與枱之間亦十分寬闊，足夠1.5米有餘，還有紙袋給食客放口罩等，讓大家可以安心用餐。

兩個細食之人，沒點炒粉麵飯，柯打幾款點心就好。都係果句，總覺得要有蝦餃燒賣才像飲茶。一籠四粒的燒賣，家陣已愈來愈難得 (三粒居多)，而且粒粒巨大又飽滿，感覺好實在。漲卜卜又企身的出品，上面更鋪了一片薄薄的帶子，吃得滿足，最重要是溫度夠，熱辣辣既點心榿會唔好食呢?!

說燒賣巨型，其實也及不上蝦餃，夾起真是聚手的。筆者沒閒情去細數她是否十三摺，反正我唔認為多一摺或少一摺會影響味道與口感，呢幾隻蝦餃既形狀算靚仔，澄麵皮不黏牙，內裡全是滿滿的蝦肉，足料非常，只是師傅放胡椒粉稍重手了些少。

打開籠蓋，雞包仔又是熱得冒煙的。包身軟熟，鞍板功不可沒。雞肉餡夠細緻，還妙在薑汁味充足，很不錯的出品。

很久沒吃咸水角這傢伙，咬落香脆而不黏牙，餡料有肉碎、蝦米及菇粒等，口感豐富，味道調校得宜。新鮮出爐既炸物，吃時亦要小心熱燙。

推唔推薦大家來吃? 睇下幾時有得堂食先講啦！

外賣囉~

餐廳資料:

帝京軒

旺角太子道西193號帝京酒店3樓

26226161