2016年12月6日 星期二

新店速遞:鵝公館 - 趕嚐頭啖鵝?!



食物:$$$1/2
環境:$$$1/2
服務:$$$

女士逛街會去商場,男人老狗如我,間中會行下鴨寮街。

與麻甩朋友在鴨記睇完嘢,大家分道揚鑣,佢有佢去教波,我有我去搵食。沿途走著,發現一家自稱潮汕鹵水鵝專家,門面光鮮,相信開業無耐,好吸引。

不過,近期人氣食店南昌冰室近在咫尺喎,怎麼辦?

掙扎良久,若然口袋裡有硬幣,或須拿出來擲公字,由上天去決定。

   
 



店子雖有鹵水腩肉、豬耳、墨魚、乳鴿等東西,但人家稱自己為鵝公館,理應要吃招牌的鵝片才對。





不論你食平定食貴,也會跟上例水一碗。係,我會叫佢做例水,因為味道淡過尼姑尿。





不消一會,鵝片飯送上,鵝片的數量,的確唔少。啖啖肉的鵝片,肉質嫩滑,大概是鹵水膽仍新,鹵味算不上很醇厚,需時啄磨,但其實也是合格以上。





既然鹵水未夠陳舊,以醋來彌補不足,也是折衷方法。





逗留了十五分鐘吃這頓飯,期間有不少人來買外賣,花費全是幾百幾百的,看來街坊挺受落。



餐廳資料:
鵝公館
深水埗汝洲街237號地下

3 則留言:

  1. 整乜鬼你食親乜野,好多時都會引到我架?是你太識食定係我太為食呢!

    回覆刪除
  2. 睇完即想起剛在大班樓吃那隻胡椒滷水鵝好回味架!

    回覆刪除