新店速遞：中華麵 - 功夫尚未到家

食物：$$$

環境：$$$1/2

服務：$$$

以往的車仔麵，予人印象嗱嗱喳喳，只有我等麻甩佬才會幫襯。今時唔同往日，家陣好多車仔麵店都入晒鋪，有些更裝修得美輪美奐，仲整埋啲什麼龍蝦湯底、藥膳湯底，花樣多多，吸引唔少OL惠顧。

長沙灣新開了間叫中華麵，雖不是什麼創新車仔麵，簡單以紅磚作主題，至少企企理理。打波前，先去吃碗麵醫醫肚，一陣輸波都無得賴。

都係像一般車仔麵店咁劃劃下啦！除了普通的車仔麵，店家更加入了幾款名貴的麵食，如鮑魚功夫麵、海參功夫麵、諸如此類。索性食豪啲，點來一碗鮑魚功夫麵，盛惠四十八個大洋。

所謂的鮑魚麵，有一隻小小的鮑魚，幾件蘿蔔及冬菇。鮑魚仔夠腍身，卻不太夠味；蘿蔔清甜無渣，冬菇總算厚肉而軟腍。

再吃一口麵，姑勿論麵質如何，陣陣的鹼水味，已完全破壞了整餐的印象。師傅走鹼唔夠喎！

看見有煎釀三寶，雙眼馬上發光，急急來一份。紅、黃、青椒切開半隻，上面鋪一件煎魚肉，貌似好睇，卻毫無釀的成份，與兒時吃的，天壤之別。同埋，三隻椒都無咩甜味…… 今時今日，雞無雞味，椒無椒味，原來乃是正常事。

經此一役，決定要找個地方，大擦堅。煎釀三寶~

餐廳資料:
中華麵
長沙灣元洲街東京街交界