2016年11月30日 星期三

角打屋台 - 暢快一夜



食物:$$$1/2
環境:$$$$
服務:$$$1/2

我份人,懶到出汁,最好唔使做天會跌錢落嚟,唔使諗問題自會解決,日日瞓到自然醒,再去吃喝玩樂。

世事如果真係咁理想,你就驚。腳踏實地工作搵食,收工後輕輕鬆鬆的吃些小食,喝杯酒(或者飲枝可樂),同朋友吹吹水,我已心滿意足。

近日發現大坑有個地方,環境好Relax,適合大家放工去打躉。

五條友一聚,先來嘢飲,喜歡可樂的可樂,啤酒的啤酒,特飲的特飲,悉隨尊便。

   




隨後,大家亂叫一通,又刺身又天婦羅又漬物又關東煮,乜乜乜,十分痛快。不過,食下食下就知大鑊,是份量多得大鑊。





以清新的胡麻豆腐,可愛的燒米茄子,爽口帶咸香的鹽辛魷魚,同埋清爽的龍蝦沙律打開味蕾。





蔥舌拿魚、三文魚腩、劍魚,與間八刺身,最欣賞是切至薄得晶瑩的間八,另外,蔥舌拿魚腩亦頗有鮮味。





雖則天婦羅是這裡的名物,都唔使點幾盤架?!海老、沙鑽、紫蘇、露筍、宮城蠔等等等,多到數唔清,各款的漿也上得好,不過厚,炸至不太油,最正係蠔,咬下去外脆內嫩又有汁,海老亦爽口,紫蘇的獨特香氣也吸引,確是佐酒及佐可樂良品。





關東煮的款式又是豐富,芝士竹輪、魚餅、蛋、蘿蔔、豆腐及蒟荺,兼而有之,做法正宗,當中的蘿蔔既腍身,又入晒味,芝士獅子狗也是必吃的,但實在無食力,去挑戰蛋了。





燒松葉蟹甲,海膽毛蟹,邪惡到呢!雞與牛陶板燒各一,趁牛肉未燒得太熟,淺嚐一片,還好;燒蕃薯,那蕃薯的形狀,盡顯師傅既心思與態度。





還吃了燒帆立貝,味噌與醬油燒也試過了,個人喜歡前者多些,較惹味。





即使再飽,一記味噌豬腸,總不能錯過。蘿蔔軟腍入味,豬腸口感好,任憑你多邪惡,也誓要將你殲滅。





瘋狂地大吃大喝,永遠是最佳的減壓方式,對嗎?

餐廳資料:
角打屋台
大坑施弼街12-13號地下B號舖
25042777

3 則留言:

  1. 你都算"懶到出汁",咁我咪懶得變化石!;P

    回覆刪除
  2. 點解唔貼最搶眼的大合照呀?

    回覆刪除
    回覆
    1. 梗係唔影啦!城中四大型男陪我食飯喎,我怕太多人葡萄呀^0^

      刪除