食物：$$$$
環境：$$$$
服務：$$$$
住左荃灣幾廿年，好多朋友問我該區有咩好食，依家就同大家介紹其中一間我既心水，Kopitiam by Saya。
Saya總店在大角咀，是本港少數獲得米芝蓮必比登的泰國餐廳，所以當佢係荃灣裝修準備開業之時，我已虎視眈眈。
荃灣店比大角咀總店更大更舒適，裝潢好有格調，還有海景，若是下午六點左右到來，那日落咸蛋黃簡直是世界級美景。
咁正既環境，如此迷人既景觀，價錢其實好親民，尤其是中午，套餐大部份食物連飲品連加一，一舊水有找，淨係食個景都抵。
嘢食水準如何呢? 香葉肉碎煎蛋飯，端上桌時已很香，很惹味好好送飯，又唔怕太辣。如果你是辣魔的話，佢旁邊有個辣椒魚露俾你。
煎蛋做到脆邊而蛋黃流心，破穿蛋黃，蛋汁加埋肉碎撈飯，要KO整碟飯其實好容易。另一款係蒜香蔥油豬扒煎蛋飯，豬扒都好出色，脆口又不太乾身，硬要挑剔既話，是蔥油份量太小了。
以上兩樣，都係$68 (另加一) 的款式，再來的泰式冬蔭清湯魚蛋河身價要高一點，多十蚊雞。是日沒河粉，店員問轉金邊粉可不，我當然無問題。呷口湯，醒胃，酸辣度恰好，與爽身的金邊粉都好夾。配料有炸雲吞皮、魚蛋、魚片、炸豬皮及肉碎等，都幾豐富，沾上辣椒魚露，不錯吃。跟套餐的免費飲品有斑蘭菊花茶，或者泰式檸檬茶，冷熱都得。在今時今日轉凍飲已是有錢人的香港而言，彷彿是個恩賜。青檸，加上真正泰式檸茶的味道，我喜歡！
講起泰菜，有啲掛住Mango Tree，又或者係。。。掛住那年那月的日子
回覆刪除