食物：$$$$
環境：$$$$
服務：$$$$
近年已愈來愈少出席那些幾圍枱的應酬飯局，但六、七個傾得埋既朋友出嚟食飯吹水，我倒是願意參與。
是夜友人吹雞，去太子食泰國菜，我當然樂意奉陪。
搞手非常之好，早早同店方寫好菜單，我只要依時出席，餸來張口就可以，樂得自在。
天時暑熱，先來些凍飲最實際。青檸梳打係大路之選，但我更建議大家可飲沙冰，不論原隻菠蘿、西瓜、密瓜抑或芒果，都是有姿勢有實際，精美岩打卡之餘，味道天然，解渴巨星。嘢食亦陸續送上，用三層架來盛生蝦刺身，頓時高檔晒。蝦肉新鮮爽甜，夾埋蒜片，沾上醒胃的汁醬，有助打開胃口。接著來的小食拼盤，有春卷、蝦餅、魚餅、雞卷及雞翼等，全是香口嘢，岩晒我口味。好耐無食過單骨雞翼了，帶有紅咖喱味道的魚餅，都幾討我歡心。店員端來魚型的器皿，起初以為是明爐烏頭的東西，但原來係明爐魷魚才對。最欣賞是師傅拿捏魷魚的火侯，完全不韌，粉絲索盡湯汁的精華，直頭要喝得一滴湯汁不剩。招牌咖喱蟹這東西，真的不要怕麻煩，戴起手套，一件一件的拿起，連肉連咖喱汁大啖的吃，才是皇道。事實上呢個蟹，啖啖肉，好正的。汁醬千萬不要浪費，用香脆的蒜茸包來伴之，無得彈。泰式紅燒豬手係睇見就流口水的出品。骨膠原豐富的豬皮，瘦肉部份都唔怕韌，夠晒腍滑，墊底仲有些酸菜來作陪襯，太太太精彩了。冬蔭公好足料，酸度足，但辣味稍為溫和，我覺得可以來得刺激些。炒個惹味爽脆的通菜來作結，已經滿足。甜品總少不了芒果糯米飯，廚師好用心，將糯米飯做成原味、斑蘭及蝶豆花三色，口感唔錯，配上新鮮芒果肉，是最好的結尾。
最愛食通菜呀！
回覆刪除爽脆惹味
刪除