星宴 - 總廚顯功架

食物：$$$$
環境：$$$$
服務：$$$$

雖則在外國生活過，但無可否認我是有個中菜胃，久唔久就想吃番頓中餐。

對上一次到訪星宴係疫情前，這幾年世界變化有幾大唔使我多講，呢度既行政總廚當然亦有更換過，所以我就當新餐廳來試的心情就是了。

見有個總廚推介的套餐，咁梗係食呢個套餐啦！唔通連總廚都唔信咩！

頭盤分別是縢椒蟶子、叉燒，以及香煎金蠔，蟶子以小小的玻璃器皿盛起，乾冰做出煙冒效果，相機/手機食先既年代，做什麼菜系都需要顧及視覺享受。再講，蟶子火侯控制到家，爽脆不韌，滲出淡淡的麻香，確是個好開始。

叉燒採用西班牙黑毛豬，厚切，微微燶邊，看上去是偏瘦，不過肉質是鬆化的。金蠔體型比想像中要大，加上桂花蜜汁之香甜，好吃。

套餐總離不開湯品，蜜瓜天籽蘭都是好東西，湯頭清甜到一個點，再加件厚大的花膠，入口煙韌，膠性豐富。吃罷花膠，喝光湯水，著實已飽了一截。

接著來是海鮮汁脆皮釀遼參，厚厚的遼參披著薄薄的黃金聖衣，咬落鬆脆，遼參爽身，再結合釀在裡頭的豬肉及蝦仁彈牙，口感層次豐富，沾上海鮮汁同吃，別有一番風味。

另一主菜係芥末澳洲和牛粒，牛肉粒鬆化是必然，淋上芥末汁多一份刺激感，再配上些什菇作點綴，整件事變得和諧。不過我最喜歡還是墊底的脆魚盞，香口好食。

吃至此時，飽了九成，好在米飯份量不是太誇。起初見餐牌寫著紅米飯，以為是健康但不好吃的那款。原來我錯晒，師傅是以紅菜頭汁熟成米飯，好看得來又多一份新鮮的甜味，混合埋脆米，配上帶子，叉燒粒及梅菜，呢個飯真係再飽都可以全清掉。

甜品並不複雜，層次分明的棗皇糕，與及辣味十足的黑糖桃膠薑汁奶凍，已經令胃甜大感滿意。

餐廳資料:
星宴
尖沙咀柯士甸道西1號港鐵九龍站香港W酒店1樓
37172848