食物：$$$1/2
環境：$$$$
服務：$$$$
或許是年紀大了，有時候已不想周圍去搵地方食嘢，如是日，只近近地在海之戀隨便找間餐廳與爸媽吃午餐。
老豆一直以為這家Hungry Monkey係食韓國料理，我糾正過佢幾次都不以為然，所以決定帶佢去了解下呢間鐵板燒的廬山真面目。
先說結論，呢度既午餐真係好抵食。除了主菜，還有凍豆腐、沙律、味噌湯、炒野菜、鐵板炒飯，串燒帶子/雞屁股，以及甜品，價錢，你估下！係連埋加一都唔使一舊水。
當然，話好高質又唔係，如冷豆腐無乜味道，炒野菜是偏咸。
燒雞屁股就免了，還是要熟帶子比較穩陣，呢個可以喎，至少火侯控制無出問題，入口唔韌，味道正常。柯打三款不同的主食，大定分甘同味。比目魚做到皮脆肉嫩，味道幾好，不過就好多魚骨，對於一向不懂吮骨既我，淺嚐了少許便放棄，反而老媽子就讚佢做得唔差。老豆的豚肉生薑燒，用的是肥瘦有致的五花肉，薄身，因而入口軟嫩帶脂香，連埋洋蔥，撈埋炒飯吃，收貨有餘。但要論最喜歡的，就一定是我的牛舌薄燒。薄身的牛脷總不會韌，而且質感帶爽脆，面頭加上炸蒜及蔥花，有夠惹味。或者對某些吃得清淡的朋友而言，調味是稍為重手，但我都可以接受。而個鐵板炒飯，都香口和粒粒分明。還以為幾十蚊貨仔的午餐，甜品會是一粒和果子或蕨餅之類的東西，原來又不是。係每人兩粒的朱古力波波，咬落裡頭是溶岩朱古力，吃時要小心，因為十分熱燙和流心，味道亦很濃郁，絕對沒有欺場。
跟餐仲有杯即磨咖啡，一時唔記得叫佢後上，咖啡真係要臨尾飲才是享受的。最終，老豆埋左單~
用行動證明唔係韓國料理👍🏻😂
回覆刪除係咪好實際先 🤣
刪除