Fabrice 嚐味: 海外篇：Peninsula House

有朋友問，檳城係咪只得地道嘢食，有沒有似樣既西餐廳架！

當然有，隨口都可以道出幾間，Peninsula House是其中之一。

從門口走上一樣，沿途是有點殘舊有點駭人，不過到埗之後，又是另一個世界。

地方蠻大，樓式超高，既有寬敞的用餐區，亦設喝咖啡的小天地。以往這樣只做晚市，最近提供埋午餐，個人覺得來吃午餐更好，因為陽光射進來的氛圍，是寧舍寫意。

不喝酒，但凍飲是必須要的，先來杯以蘋果汁作基底的特飲，清涼一下。

冷盤來份吞拿魚，刺身食法，邊邊位沾些黑白芝麻以豐富口感。頂頭放了脆紫薯片，除左令整體賣相提升外，脆卜卜又幾好吃的。

接下來的鴨肉加乃隆，煙韌的意大利麵捲包裹著鴨肉，口感幾好，然而鴨肉有點羶，我可以接受到，但相信不是人人喜歡。

另外的是日魚獲，係野生海斑。跟鬼佬那些煎得魚皮脆脆的又有所不同，但如此厚身的魚肉，仍保持到嫩滑口感，我已沒什麼投訴。

甜品挑了Butterscotch Madeleine，四件的馬德蓮蛋糕跟一球雪糕，再自行淋上Espresso，儀式感是有。建議先吃馬德蓮，若然沾得太多咖啡會變得太濕和苦。而雪糕配咖啡就當然合拍。

檳城其實有唔少類似咁舒適既餐廳，個人覺得特別適合來品嚐午餐。

Fabrice 嚐味