2023年5月22日 星期一

Harbour Grand Cafe - 活波龍、生蠔與香蕉船



食物:$$$1/2
環境:$$$1/2
服務:$$$1/2

久違了的酒店自助餐。

有人吹雞,話去Harbour Grand Hong Kong任飲任食,大家又柴娃娃咁去聚下。

Buffet有太多嘢食,容許懶惰既我只介紹下這兒的重點。

最大賣點,毫無疑問是每人一隻活加拿大波龍。你無睇錯,係一隻,唔係一邊!龍蝦多羔,肉質細嫩唔會像趙擦字膠,尤其是兩隻龍蝦鉗,鮮甜可口。

冷盤當然有Cold Cut,有芝士等,我最欣賞係佢有唔少款式既沙律,排得整齊企理,令人胃口大開。

香港人食自助餐,第一件事梗係問有無生蠔。放心,呢度既凍海鮮除左蟹腳、凍蝦、龍蝦等之外,亦有生蠔供應,而且水準不遜的。

刺身都唔會揸流灘,特別推薦大家食刺身蝦。

中式熱葷都似模似樣,譬如有茄汁煎蝦,花膠西蘭花等,必吃的還有片皮鴨,再唔係可以整碗粥,帶埋老人家嚟食都一定有嘢岩食。西式既則有Pasta、燒牛肉等。

點心有我喜愛既燒賣,熱呼呼來幾粒,滿足!

中式有廚部點部既嘢,自然亦有燒味。叉燒如果可以肥啲就好了。

平時多半會略過的粉麵檔,竟發現有喇沙之蹤影,來一碗每人夾兩條試下味都好,結果湯底有驚喜。

吃到此時,飽到上心口,要跳去甜品環節。中式的豆腐花好受大家歡迎,西式既蛋糕亦不失美味。

呢度既另一賣點,雪糕是採用Movenpick,拿幾球不同口味,加隻香蕉,自行弄隻香蕉船,無限童年回憶。

總括而言,單係全隻既活波龍,生蠔以及名牌子雪糕,已經值回票價。


餐廳資料:
Harbour Grand Cafe
北角油街23號港島海逸君綽酒店3樓
21212689


2 則留言:

  1. 曾幾何時,我呢邊某酒店自助餐有原隻蒸龍蝦任食,不過都已經係好多年前嘅事lu。

    回覆刪除
    回覆
    1. 以前香港都有幾間酒店有, 不過都係過去式了

      刪除