十二味 - 不值一提的麻婆豆腐

食物：$$$
環境：$$$1/2
服務：$$$1/2 

麻婆豆腐癮起，腦海即時浮現官塘咖啡店Coffee or Tea那驚為天人的出品，然而依家疫情嚴峻，實不好坐成粒鐘車去食個午餐。

唯有近近地在荃灣找代替品吧！

最就腳，大概是如心廣場二期的十二味。主打川菜的館子，水準應該唔太差卦?

市況慘淡，即使中午繁忙時間，只見小貓三兩隻，可隨便揀位坐。

家陣唔少食肆都會配備酒精搓手液及口罩套，呢度都唔例外，而且個口罩套 (信封)設計得幾靚仔。

點午餐，會跟份小吃，是日係土豆絲。幾爽口又帶點點麻油香，蠻清爽的。

柯打左兩款餸開心些牙，回鍋肉是川式的做法，可是炒得過了火，又乾又嚡口，反而被爽脆的蓮藕搶去了風頭。

一心為麻婆豆腐而來，當然唔會走漏此味。辣度是夠的，還隱隱滲出微甜，只是靈魂的花椒粉的氣息蕩然無存，令成品欠缺吸引力。Coffee or Tea的麻婆豆腐，是會令人追著吃的，但這裡的嘛，我嚐幾口便想放下。

兩款餸都麻麻地，導致一小碗的白飯我也不吃清零。

跟餐送一盒檸檬紅茶，若然想轉其他飲品，補差價就可以。

念念不忘，遲早都要再去官塘，整個正到暈的麻婆豆腐飯......待疫情稍為好轉先喇～

餐廳資料:
十二味
荃灣大河道98號如心廣場二期2樓215號舖
26682115