2014年9月2日 星期二

Oolaa - 吃Brunch吃上癮



食物:$$$1/2
環境:$$$1/2
服務:$$$1/2

唔係呢個忙到抽筋,就係嗰個去左旅行;不是這個約了朋友,就是那個唔得閒,大局是愈來愈難約,同中六合彩既難度相差無幾。所以,有時人少少都會出來聚一聚,反正定好了時間地點,得就嚟,唔得就下次。

今次的用餐地點,由好友Oli提議,是上環的Oolaa,去食Brunch。短訊發出後,大家都沒有異議,造就了這五人小局。

全是外國人

中午三十幾度的高溫,從香港站走上Soho,都幾係嘢。大汁疊細汗的來到,馬上大喝幾口凍水,降降溫,抖順條氣才慢慢揀吃什麼東西,反正我們有大把時間。舉目所見,在場十居其九都是外國人,我們幾個,是否霸佔了人家的地盤呢?
 
四隻蛋的大奄列~
翻開餐牌,又想食賓尼特蛋,又想食大早餐,仲想食埋奄列,選擇困難症似乎又再發作。掙扎又掙扎,最終鎖定了大奄列,在十四款的餡料之中,可選配三款,若要再加的話,也可,盛惠每款廿五個大洋。
  
好飽足
以四隻蛋做成的奄到,份量果然唔講得少,而且煎得微焦,賣相吸引。至於餡料,我挑了香口的煙肉粒,仲有爽口的蘑菇,口感自當不錯。當然,還要有香濃的芝士,整件事才會來得妥當。有我喜歡的Brie,不作他選了吧!
 
指定項目
分甘同味,從來是我們的飲食宗旨。於是,又試了院長叫的賓尼特蛋。這裡的Eggs Benedict,有幾款可選擇,譬如是火腿跟菠菜,或者煙肉配牛油果,再唔係連蘑菇都有。而院長揀的,是煙三文魚與菠菜,煮蛋的火候控制得唔差,荷蘭汁更是非常Creamy,配上軟熟的三文魚、嫩口的菠菜,以及Muffin同吃,滋味無盡。
 
有人吃甜的
在座的JJ選了Pancake,有機會試試店家的甜點,就可更全面了解其水準。三層的班戟皮,唔得軟熟,要靠糖漿及夾雜著在裡頭的士多啤梨去拉分。
 
可惜不能喝
這裡的咖啡理應要品嚐的,只可惜當日咳得厲害,而且翌日有重要會議,還是乖乖放棄,下次再來喝吧!
 
下次再吃Brunch~

吃過豐富又醒神的早午餐後,大家各自有活動,好好享受天朗氣清的假日吧!

餐廳資料:
Oolaa
上環蘇豪必列者士街聚賢居地下舖
2803 2083

6 則留言: